嚟到季尾，大家嘅焦點都落喺爭標、爭歐聯資格同護級之上，但亦有一啲球隊已經提早進入放暑假嘅階段，就好似車路士咁，呢排真係踢風流波，加埋傷兵又唔少，睇落同季初嗰隊唔同晒樣，成隊預備組咁款，相信嚟緊對曼城都凶多吉少。
車路士嘅hea，係好全面，唔單止球員，而係球隊上下都係畀人一種咁嘅感覺；領隊軒迪克冇乜鬥心，全隊都等緊新帥干地上任後先重新啟動。不過，最近有個車仔球員令小弟留下幾好印象，就係喺高登外號「龍虎切」嘅中場羅夫度斯卓克（右）。羅夫度斯卓克最初踢防中，但最近推前一格踢攻中，喺約翰米基爾同法比加斯前面，佢喺禁區前啲畀波同護波都唔錯，對維拉嗰場仲射入個人英超首球。相比阿仙奴嘅伊禾比同曼聯嘅拉舒福特，羅夫度斯卓克的確冇咁搶鏡，但小弟睇好佢，希望佢得到干地嘅歡心啦。
講起hea，小弟同牽牛兄都講起，最近足智彩嘅數據中心都hea咗，之前先係冇得睇聯賽射手榜，家陣喺球隊賽績入面就連邊個入波都睇唔到。波就越開越多，比甲、巴保聯都唔放過，但資訊就越來越少。小弟以前睇過一位足球評述員嘅專欄，入面講到香港出現球員有唔同譯名嘅問題。足智彩作為香港唯一合法嘅足球博彩機構，其實可以組織起香港傳媒，統一外國球員譯名，作啲實際貢獻。不過睇嚟，相信足智彩寧願諗吓幾時開意乙、西乙，都唔會做呢啲嘢。
文：咖喱