民主思路噚晚搞咗場《美國飛人》電影籌款晚會，成功籌得170萬。湯家驊搞民主思路開宗明義走中間溫和路線，所以各方陣營均畀面到場，好似羅范椒芬、鍾國斌、劉千石都罕有到場，連兩大黑馬、政務司司長林鄭月娥同財政司司長曾俊華都畀面出席。
林鄭話，自己冇鬍鬚曾咁叻睇咁多戲，因為工作實在太忙，台下即時忍唔住笑，唔知係咪寸緊鬍鬚曾冇嘢做呢？跟住致辭嘅鬍鬚曾就話，自己真係睇好多電影，但都係星期日睇早場，所以有機會睇九點半係非常難得，仲話最近立會主席曾鈺成教大家玩Pun（語帶雙關），話《美國飛人》呢套戲其實一樣都係，透過Race呢個字，既講賽跑也講種族，佢話睇完呢套戲後，想喺網誌寫番啲感受。