邊個話基斯坦奴朗拿度（C朗）淨係識對弱隊刷入球！C朗喺周二嘅歐聯八強次回合大爆發，上演帽子戲法，以一己之力幫皇家馬德里平反首回合輸0:2嘅敗局，喺主場以3:0大破禾夫斯堡，兩回合反勝3:2晉級，教練施丹亦開心到爆「呔」！
一個戴帽救全家
皇馬首回合作客輸兩球，呢次返到主場，施丹都醒醒定定，唔出後防大毒瘤丹尼路雷斯，用番丹尼爾卡華積，但最緊要都係有狀態大勇嘅C朗喺度。15分鐘，卡華積斜傳，C朗門前接應射成1:0。呢場C朗真係十八般武藝出齊，兩分鐘後佢轉用頭槌，接應卻奧斯嘅角球頂成2:0。C朗一出招，皇馬眨吓眼就平反敗局，兩回合追平2:2。唔通要踢加時？C朗話唔使！77分鐘，皇馬博到罰球，C朗操刀射入，幫皇馬喺次回合鎖定贏3:0，總比數反勝禾堡3:2入四強！C朗呢個帽子戲法都相當全面，有門前接應，有頭槌轟炸，仲有罰球破網，證明佢真係一部入球機器，想點入都得！
C朗勁到爆，個人喺歐聯第五次大演帽子戲法，平咗美斯嘅紀錄；唔單止皇馬球迷興奮，就連施丹都全情投入。比賽末段，有次賓施馬錯失機會後，鏡頭影向施丹，見到佢好失望咁轉身，但重點係佢條褲爆呔，露咗大髀出嚟。
施丹賽後大讚C朗，「佢證明咗自己係世界最好嘅球員。」C朗就話：「係一個夢幻般嘅夜晚，最後賽果好完美。我有入波嘅DNA，我要繼續為球隊入波。我知有人批評我，但我唔理，繼續努力，入球數字就擺喺度。」
