中聯辦法律部部長王振民噚日到外國記者會（FCC）演講，竟然吸引到一位才子捧場，就係多年前被揭喺FCC同女大學生張茆合照而搞出唔少風波嘅倪震！
話港人生活圈子「fb化」
八方問過倪震，佢話家陣搞緊桌球室同酒吧生意，可以抽時間參與呢類講座，自己想聽多啲唔同聲音，𠵱家社會撕裂，唔應該「facebook化」自己嘅生活圈子，只聽啱聽嘅嘢，強調藍絲、黃絲同獨立聲音都要聽，「我由細到大都留意時事，𠵱家個社會都離唔開政治，要理解唔同諗法，先可以構成自己嘅諗法，無話啱定唔啱」，並透露同爸爸倪匡一向有傾政治，大家諗法唔同，聽完後可能會覺得對方「好儍」。
特首戰開波，支唔支持梁振英連任？倪震道出唔少港人心聲：「邊度到我講支唔支持？我都唔係嗰個選委會成員」，仲話過去做過好多唔同行業，但至今都搵唔到一個途徑，令自己可以有權選特首：「呢個可能係結構性問題，所以點到我講啫？」