鄉議局呢排因為組黨問題風雲色變，主席劉業強（Kenneth，圖）應該好頭痕，但佢仲有個大project搞緊，就係鄉議局90周年慶典，據聞至少三壇大型慶祝活動，包括6月會喺馬會搞個大型嘉年華、10月則有沙灘音樂會，以及12月有老爺車巡遊。點解局慶活動6至10月有咁長真空期？無非因為屆時係立法會選舉，免舉行活動又惹種票之嫌。
查實Kenneth接任主席都一段時間，喺長輩群中50歲嘅佢好年輕，應該為個局注入新動力啩？原來Kenneth都有滿腹大計，包括革新鄉議局網頁，甚至考慮增設facebook。佢仲忽發奇想話，可以搞搞新意思舉行村姑大賽，仲要一人一票選出，既收宣傳之效、又可聯繫村民。八方更關注，係咪搞埋鄉郊小鮮肉比賽先？