澳洲儲備銀行噚日公佈新版5蚊紙鈔票，點知變成澳洲「負評王」。澳洲網民批評，紙幣上嘅英女皇伊利沙伯二世嘅肖像，執相執得太誇張，表情生硬，又踩紙幣上鮮黃色嘅金合歡花似一粒粒病毒。
澳洲紙幣嘅手感同香港2007年發行嘅紫色「10元膠鈔」相似，兩者都係塑膠製造。澳洲新版5蚊紙，加入新防偽特徵外，仲有獨特紋路，方便視障人士識別。新鈔尺寸大細同舊版一樣，顏色方面以淺紫為主調，但新鈔中間多一道彩藍色，又多咗隻澳洲著名嘅東尖嘴吸蜜鳥。
新鈔9月1日正式發行，但已經俾澳洲網民鬧爆，甚至有人話，望見新鈔就想作嘔。多數人批評新鈔嘅英女皇構圖表情唔多自然。澳洲網民又發揮無窮想像力，齊齊「二次創作」，寧願搵卡通人物代替表情繃緊嘅英女皇。