每次約班老鬼踢波，見面聽到第一句話肯定是：「你又變咗！」除了變老了、變慢了、肚腩變大了外，改變的還有很多：由sales升了為銀行經理的「小黃」，變成「大黃」後已不再搭電車，例牌的士到場；逢波必到的Roger變成「飛機王」，皆因放假都頻頻要OT；出名瀟灑的高佬俊，從來只是雙手插袋，毛巾都唔帶條，如今卻不只孭着大包小包，還要推着BB車，皆因老婆囝囝齊齊到場……試問誰沒有變呢？
但奇怪的是，當大家換好波衫踏進球場，就好像突然走進個像蟲洞甚麼的靈異空間，全體時光倒流20年：大黃同小黃一樣怕頂頭槌怕得要死；阿強依然係搏晒老命滿場飛；高佬俊依然鍾意指指點點，講多過踢；阿東依然係冇速度、唔夠快、走得摩，但處理死球仍永冇甩拖；還有依然鍾意助攻但冇氣回防的左閘Simon、堅持死扭唔交波的阿文、肚腩大過南瓜但腳法依然瀟灑的阿明，和總是企圖扮碧咸半場笠射對手的我。
雖然踢完場波，「蟲洞」立即關閉，痠痛三日的雙腿會提醒你已經返回現實。但無論場外身形、身家、身份怎樣改變，球場上那個你，總是與廿年前那個一模一樣。足球雖未至於可令人長生不老，但返老頑童的功效，比幾千元一支的Botox肯定更勝一籌。秦始皇當年命人發明長生不老藥，豈料下人介紹他玩「蹴鞠」，原來如此！
方栢翹
now足球評述員