阿里巴巴主席馬雲舊年2月高調成立10億元「阿里巴巴創業者基金」，過咗一年有多，仍未有start-up拎到錢。不過，馬雲對於真係想拎到手嘅公司，就好疏爽，最近作價10億美元（78億港元）買入東南亞主要網購平台Lazada主要股權。
香港冇幾多人聽過Lazada，查實公司只係成立咗4年，就已經喺東南亞6個國家插晒旗，包括星馬泰、印尼等，香港亦開咗負責採購嘅辦公室，發展迅速。
公司指，目前每月有1.5億人瀏覽其網站，舊年3月計，全年交易總額（GMV）超過10億美元。雖然唔知有冇賺錢，但已經吸引摩根大通、英國零售商Tesco同埋淡馬錫投資。
阿里話，今次投資，可以發展東南亞市場。之但係，同樣係start-up，香港仲係冇乜聲氣，阿里好似有啲偏心囉。