「巴拿馬文件」（Panama Papers）搞到全世界風風雨雨，冰島總理因此辭職，英國首相金馬倫已故父親因係巴拿馬律師行客戶，屢被質問有冇因父親避稅而得益，前中國全國政協主席賈慶林個外孫女仲叻，1992年出生，在史丹福大學讀書時已成為律師行客戶，今年24歲，有香港身份證，有錢到買咗香港一級名宅「傲璇」一個單位，造價三億九千萬元。呢呢，佢應該係一早有咗香港銀行戶口嘅，如果佢依家先至去開戶口，一定被銀行查問財富來源，相信佢嘅答案好有趣味性。
巴拿馬律師行Mossack Fonseca被黑客入侵，一千一百萬份文件失竊，現在曝光嘅只係小部份，美國大戶名列榜上者比較少，於是網上流傳陰謀論（zerohedge.com）話係索羅斯幕後贊助咁講，呢啲嘢一定冇人肯認嘅，難以證實，但此事令左丁山想起湯告魯斯一套陳年電影The Firm，改編自暢銷小說，原作者係大名鼎鼎嘅律師小說家John Grisham，內容講一個哈佛法學院畢業生受田納西州曼菲斯一間律師行高薪聘用，俾埋靚屋靚車佢用，但日日做到頭昏眼花，後來湯告魯斯發覺律師行有好多離岸戶口似係芝加哥黑幫嘅洗錢逃稅戶口，FBI又逼埋身要佢做卧底……情節非常緊張。估唔到今天的現實與小說電影差唔多。
其實離岸戶口，世界上多不勝數，香港可能係全球「離岸戶口」之都，冇離岸戶口嘅，邊度算係有錢人？唐英年廢除香港遺產稅之前，用離岸戶口買樓買股票擁有個人資產，已是理財常識，任何一位會計師律師都會教客戶開離岸戶口，多在英屬處女島（BVI），三十年前左丁山做直接投資公司之時，每一單投資都用一間離岸公司，數目之多，只有會計部先至知得清楚，全香港都不認為離岸公司為非法逃稅工具，凡有法規，多數有豁免條款，律師就係從呢啲豁免條款中搵方法令自己客戶得到豁免，此是合法避稅，不是逃稅，有時為咗避免年年做審計，向公司註冊處申報，不少馬主團體以前都係用一間BVI公司開戶口嘅，不過依家世界政治氣候改變，敵視所有離岸公司，一竹篙打盡一船人，新嘅賽馬團體想開個離岸銀行戶口都怕好難咯。