這陣子記者放蛇放不停，周圍問地產公司樓換樓的捷徑，要賺得多過馮程兩公婆而又唔會惹屎上身。傳媒要是掘到內線，證實有灰色大賺地帶，炒家逆市都可以發達，樓市就算像野村分析，未來會大跌六成，都未驚過。香港行政、司法、執法的根基大動搖，唯獨樓市神級不移，愛國傳媒都忍唔住大讚，錢放在巴拿馬穩，樓買香港本土的妥。
另一團隊機場突擊，睇吓梁家上下與特辦人物，點樣超然於禁區內外，手提行李離身一小時迅速回歸，無穿無爛，證明香港機場，是你想dream場，正！靚！記者再放蛇，問其他旅客如何處理自己丟失的行李。冰島旅客堅決不會打電話俾爸爸，也不會叫首相出聲，因為首相已經因為巴拿馬密件曝光，引咎落台。外國遊客hea，強國遊客則比重陰豪N倍，冇咗件手提，唓！買過件新的，老子就是有錢！要是地勤留難，香港人啊，就是欠打！星X日報大條道理俾重陰細姪女100分，讚她這個特二代只是打電話，冇打國泰職員兩巴掌喎！這種港女，去哪裏找！