天梯不可只往上爬。乘着中國人財富急增，生意從而迅速膨脹的奢侈品品牌，終歸都要面對下行壓力。Prada（普拉達，1913）上周公佈全年業績，純利按年跌26.6%至3.31億元（歐元．下同，折合約29.3億港元），盈利創五年新低之餘，更是近12個季度內第11次盈利不達標，情況嚴峻。
跟喜愛購物的友人說起Prada業績，友人笑指不用看業績，也知道奢侈品品牌「超唔掂」。他說：「你知唔知好多名牌都減咗價好耐？（唔知呀。）乜你咁都唔知㗎！以往啲名牌，每年減兩次價，一次5月，一次11月，清貨大減價兼正式換季，今年就勁喇，3月就開始減。」
他續稱：「話晒都叫名牌，唔可以好似啲平價嘢咁，喺門口掛個大牌，大大聲話減價，咁第日仲使出嚟行？所以佢哋通常都係巧立名目咁叫啲客落舖，好似話送按摩呀，送嘢食呀，送飛咁樣，引咗啲客落嚟，先同啲客話有驚喜減價喎。幅度好大㗎，最勁平一半。」
平一半！奢侈品品牌咪好大鑊？他笑一笑後說︰「你話呢？」終須會時辰到，別怕。
密西比