市道艱難，每間公司都面對裁員縮皮嘅難題，高盛嘅節源方法就最受年輕人歡迎！
高盛行政總裁布蘭克費恩喺年度股東信中透露，高盛過去4年整體薪酬減少2.7億美元（約21億港元），員工數目反而增加11%。
點做到？唉，其實大家都應該諗到，𠵱家好多公司都做緊，咪就係轉請多啲後生仔囉。具體咁講，高盛入面嘅分析員、助理等初級員工嘅數目，喺過去4年增加17%，高級董事總經理、合夥人等就減少2%。
據講，外國頂級銀行嘅董事總經理平均年薪約100萬美元，而分析員平均年薪僅11萬美元，助理約20萬美元。人工相差咁多，炒一個董事總經理，夠請幾名初級員工喇。高盛新請嘅人，大部份屬於營運、IT、合規部門。
除咗請後生仔，高盛又將部份業務由紐約、倫敦，搬去新加坡、鹽湖城等成本相對低嘅地方，咁就成功cut cost嘞。