試過喺立法會玩手機轉珠遊戲，令唔少人以為自由黨青年團主席李梓敬係機迷，不過佢就否認，仲自爆小時候父母鎖起部世嘉遊戲機，長過10日嘅假期先有得玩，新年、暑假同聖誕先有得打吓機。一定要問係：仲有冇轉珠先？「完全冇啦」，答得快到呢……
32歲嘅李梓敬中學讀拔萃男書院，自言絕非活潑男，讀書時都幾hea，好在掌握少少考試竅門，成績尚算中游。佢話試過俾老師罰企，無非都係上堂傾偈囉，仲因此見家長㖭呀！
佢話細個鍾意打網球，中學則參加歌詠團，亦會外出表演，最記得同德望學校唱過mixed choir。斯斯文文嘅佢仲鍾意擲鐵餅，估佢唔到喎！中學畢業後想到外國升學，英美之間佢揀咗後者，覺得美國似乎開放啲。雖然反同志平權又嚴打假難民，但佢話生活又係另一回事，好似當年住宿舍，「兩年嘅同房都係gay，仲有個best friend係美籍印度人」。