通訊事務管理局噚日同傳媒茶敍，話題離唔開最近開台嘅ViuTV，通訊局主席、資深大律師何沛謙被問到有冇睇ViuTV時話：「有呀，覺得幾新鮮！」仲自爆睇咗韓劇《太陽的後裔》同《跟住矛盾去旅行》㖭！
原來何沛謙平時返屋企多數睇新聞，間唔中先睇綜藝節目，所以今次係首次認真睇韓劇，又話覺得《矛盾》好睇，會追落去！有記者問佢，有冇獲邀參演《跟住矛盾去旅行》以及想同邊個去先？佢擰晒頭大笑話冇呀！
亞視熄機前預告有告別卡，何沛謙話當晚都有睇亞視，仲好期待告別卡，但最終冇出現噃。對於有前員工指通訊局阻攔播放告別卡嘅指控，佢話係無中生有，唔覺得告別卡內容敏感。