耀才（1428）行政總裁陳啟峰（Nelson）下月以50歲之齡退休，主席葉茂林噚日喺中環蘭桂坊Zentral幫佢搞farewell party。葉老闆提到，跟Nelson相識廿年，關係特別，當年搞金融都係跟Nelson學，認真係畀足面對方。
葉老闆又爆料話，佢哋都鍾意鋤Dee，仲笑Nelson係「魚腩王」：「佢有時輸成個月糧，幫補我去大富豪同埋溝女！」Nelson笑住回敬，指葉老闆好大Dee癮，「我未收工就有電話叫我去鋤Dee」。不過二人關係正係透過鋤Dee建立，Nelson覺得，可能佢輸錢都冇乜怨言，葉老闆因此覺得佢夠真，信得過。
Nelson話一早決定要50歲退休，退休後，佢會移民加拿大跟家人嘆世界。葉老闆即刻講笑話，諗住叫Nelson去加拿大幫耀才開分店。