【汽車籽：軸芯人物】
本港有不少古董車車迷，但基於土地問題，甚少人可以闢室動手修理陳舊愛駒，只得交給車房代辦，事後享受駕駛及加裝零件的樂趣。是次訪問的主人翁Eddy Chow，卻不惜自租車房，花上廿萬、兩年時間，把一台產自1976年、機件本已不合規格甲蟲車，翻新成為新的一樣！當中的耐心、時間和金錢缺一不可。神奇的是，任職平面設計師的他對維修汽車全無認識，只因一時之氣才踏上這趟奇妙旅程。
「我相信，我玩車嘅樂趣絕大部份係嚟自整車，揸車只係之後嘅一種獎勵。因為我享受整車，所以爛車、壞車都唔緊要。」訪問僅僅開始了33秒，Eddy便神態自若地說出這番話。自那滿足的笑容，我便知道，他是多麼享受修車的過程。在他身旁是台產自1976年的福士甲蟲車，翻新的原因是夠經典，「即使唔識車嘅人，都會知道佢係甲蟲。」
自己一手一腳重新翻新，總共花了廿萬及兩年時間，兩、三個月前才剛剛完成，重點是任職平面設計師的Eddy，本對汽車維修全無認識。當年能夠狠下決心，只因與朋友把酒言歡間忽發「雅興」，一時衝動花八萬元自日本購入一台破舊的甲蟲車，但是Eddy事後也沒後悔，「我覺得整衰咗，或者整得唔好嘅機會高好多，但呢啲係一種樂趣。由唔識整到識，係一個學習嘅過程。如果翻新得唔好，整得唔靚，那就可以再嚟過，就係咁先好玩。」
為咗揸出街 驗車嘥半年
外人關心成品，他只沉迷過程。因為這台舊甲蟲車剛買回來時破爛不堪，翻新前，必須事先通過運輸署的檢驗，不然就算成功修好，也無法駛到街上，「驗車都驗咗三、四次，每一次都有一啲新嘅嘢唔合格，例如逼力、廢氣，甚至乎避震都漏油，將佢哋整好晒、合乎規格之後先可以進行下一步嘅改裝。而驗車呢個階段，都足足維持咗半年以上，架車先至符合標準。」翻新初期，由於缺乏相關知識，Eddy說自己是邊學邊做，在網絡上找來甲蟲車的維修書，然後買所需設備，再與朋友合租車房。Eddy說，翻新的首要條件是盡量能夠把零件循環再用，除非損壞太過嚴重，才從海外訂購回來，「好多嘢都係靠手工嘅，例如錶板、軚盤嘅翻新，接駁線材都係自己嚟。呢啲零件冇辦法自己整，都係上網訂返嚟。」
誠然，一個人翻新一台車，還要是一名新手，實在有點不自量力，Eddy也深明自己能力有限，幸而朋友夠多，一人計短，二人計長，集合眾人之力，藉困難增進彼些友誼，「佢哋嘅專業幫到我好多，例如噴油，有位朋友噴得好啲，啲嘢就等佢幫我噴；有位朋友做開時裝設計，佢就會幫我整啲軟嘅嘢，好似內櫳、座椅同頂篷，我相信係同朋友交流嘅一個好節目。」萬萬料想不到，修車也能成為朋儕間的娛樂活動。但是，儘管出外可以靠朋友，維修過程也非一帆風順，「油都噴過好多次，因為我哋第一次噴車又要試油、試mixture、試槍嘅壓力，如果噴唔好就要將佢鏟起晒再噴過，呢部車頭頭尾尾噴咗幾次。」當然，耐心總能獲得回報，Tiffany Blue車身的耀目光澤及順滑程度，光看已經忍不住讚嘆，輕掃車身，實在無法相信是由一群新手親自做出來的成果。
整車要有主題 似砌大件模型
訪問過很多古董車主，大多堅持愛車由頭到腳都要採用原廠零件，務求讓它還原成最原始的模樣。Eddy坦言自己追求的並非「原廠」，而是新添的配件及零件是否與它合襯，「例如車頂嘅小型太陽擋，或者你會認為佢冇任何用處，呢啲配件並唔係功能性嘅嘢，有啲人唔會放上車，但我覺得我哋整車，要擺一個主題入去，而呢架車嘅主題就係懷舊，小型太陽擋好啱呢個主題，所以就用佢。」
Eddy的設計底子，讓這台甲蟲車變得與別不同，他坦言在翻新期間一度想過放棄，但為了一圓夢想還是捱過去了。對於眼前的作品，他尚未感到滿意，將會繼續加入更多獨特配件，未來亦打算再弄一台採用甲蟲底盤的古董車，如他所說：「其實整車對我嚟講，好似砌件大模型咁，我相信嗰種滿足感係其他嘢畀唔到我嘅。至於好多人覺得係使錢嘅玩意，其實我覺得人總要有個嗜好，我嘅嗜好就係整車。」
記者：梁立勤
攝影：林栢鈞
編輯：陳國棟
美術：利英豪