記得小時候，阿爸每個月尾一出糧，就畀晒成份糧阿媽做家用，而阿媽就會每個星期畀零用錢仔女返學。估唔到證監會主席唐家成到今時今日，都鍾意每星期畀家用一次，咪好似畀零用錢仔女咁囉。
話說唐家成噚日出席證監會資助嘅投資者教育中心（IEC）活動，台上自爆同太太結婚三十幾年，至今都係每星期畀家用，仲有本賬簿記低㖭！
唐夫人係英國人，唔通係鍾意跟英國打工仔做法，出周薪？唐家成覺得咁樣係理財嘅好方法喎，唔知大家同唔同意嘞。
講到教仔女同乖孫理財，唐家成就話，佢教女就教量入為出，出國讀書之前都唔准用信用卡。教孫呢？「唔關我事，係我個女嘅事。」之前佢都有講過自己唱歌𠱁乖孫瞓覺，家陣睇嚟，佢都係專心寵壞乖孫，錫到燶嗰種公公。
講番噚日呢個活動，其實係IEC新推出金融理財教育平台「錢家有道」，以一家六口加隻貓為故事背景，以輕鬆手法為市民提供理財資訊與工具，協助解決生活上嘅理財問題。呢隻叫「錢錢」嘅貓係咪好可愛呢？