究竟"Time lies. See why."點解？政界中人噚日忙於拆解，想了解吓立法會主席曾鈺成諗緊乜。曾主席繼早前喺《am730》專欄以「梁振英」作上聯，對出下聯「國安法」後，噚日再以pun（一語雙關）為例指Time flies可解時光過得快，亦可解「給蒼蠅計時」，繼而就抽水出題：「如果我告訴你以下的話和最近的新聞有關，你會怎麼理解：Time lies. See why.」。
毛EE：暗指CY一直講大話
曾鈺成同CY嘅關係，不嬲都「有目共睹」，呢排CY家庭爆出咁多是非，政圈仲傳佢下屆未必連任到喎，莫非係再次發動ABC（Anyone But CY）嘅好時機？曾主席呢個時候意有所指，難怪令人想入非非。
八方噚日喺立法會遇見曾主席時，都有問過佢到底句嘢點解？曾主席一貫笑騎騎咁話，最少有3個唔同解釋喎，咁即係乜？開估好過亂估噃？但佢只係叫八方做吓功課先，似乎唔想心意咁快俾人破解。
八方搵嚟英文了得嘅公民黨立法會議員毛孟靜解謎。俗語話時間證明一切（only time will tell），毛EE估計主席今次反過來用"Time Lies,See Why."，先指時間會說謊，並以CY諧音See Why作為問題同答案，暗指CY上任至今一直講大話，覺得主席「點止抽水咁簡單？我諗細佬曾德成一事（被梁振英炒魷）佢真係好shocking（震驚），如今有仇必報」。
李八方
mailto:[email protected]