特首梁振英三女頌昕被指恃老竇身份喺機場獲特權嘅風波仲未平息，八方噚日見到全國政協常委、前政務司司長唐英年，當然問佢點睇？佢話自己唔了解事件，不便評論。
咁佢有冇試過喺機場漏咗行李而要返回非禁區攞番呢？答案係冇嘅，佢話以往同仔女講過，唔會因為佢係政務司司長或財政司司長而有特權，一家人同普通旅客冇分別：「佢哋從來都冇漏低嘢要出番去攞，我以前係CS（政務司司長）時，我好清楚話畀佢哋聽，你（仔女）係冇特權！平時我送佢哋機，去到門口，跟住byebye ，佢哋全部自己一手一腳做番晒。」
之不過呢，梁振英話同職員講過自己係頌昕嘅爸爸喎，咁樣唔係顯露自己嘅特首身份咩？唐唐就笑笑口話：「我唔知頌昕有冇講過佢係梁振英個女喎！」當記者追問，有地勤見到梁唐青儀，都應該知道佢係特首夫人啩？唐唐反問：「我唔知佢嗰日件衫係乜嘢顏色?」然後，哈哈大笑。點解關顏色事？相信大家都心照！