一向鍾意食越南牛肉凍檬，貪佢酸咪咪夠開胃。早前拜讀左丁山專欄，佢提到中環有間越南餐廳BÊP，好奇又走去試一試，原來呢間越南餐廳喺蘇豪士丹頓街同威靈頓街都有分店，前者喺兩年前首先開業，於是就走去試呢間。
呢間餐廳喺一條小巷入面，有少少難搵，中午食晏時間全店爆滿，仲有唔少老外幫襯。試咗一碗香茅炒牛肉撈檬（68元），特別之處，係廚師即叫即炒牛肉，坐喺吧枱，見到女廚師快手將薄切牛肉與香茅、新鮮菠蘿肉、洋蔥等材料同炒，再鋪上檬粉面。牛肉食落香口嫩滑，加埋其他配料，味道正路，份量對女士而言，應該剛剛好，男士可能就要叫多款小食。
BÊP係老牌芽莊嘅另一個品牌，係越南廚房嘅意思。呢間餐廳唯一缺點係樓底矮，人多時十分嘈吵，肯定唔係食飯傾偈嘅好地方，不過一個人喺中環想食碗靚檬粉就無所謂喇，嗱嗱聲食完就走。