香港有好多事情發生，一啲名人新聞或「醜聞」見報不過一兩日，就有其他新聞蓋過。譬如類似麥齊光式嘅新聞，發生於民政事務局常任秘書長馮程淑儀身上，爆料嘅新雜誌01周刊，呢本雜誌目前銷路未如理想，在中環報攤根本唔多見得到，但01爆出馮程淑儀換樓新聞，有報紙轉載，咁就廣為人知啦，但爆料時間啱啱遇上假期長周末，一時之間炒唔起，跟住就有黃之鋒在滙豐開唔到戶口，「十年」攞最佳電影獎，劉炳章（理大校董）要求理大開除理大專任導師鄭松泰，以及「我係梁特」嘅機場風雲等新聞，一幕接一幕，似足六國大封相，比較之下，就冇人留意馮程淑儀咯，算佢兩夫婦夠運。點不知一個屈尾十又有馮永業簽名紙曝光，搞到馮程淑儀單身拖喼離家，令花生友目瞪口呆！
目前風眼焦點當然係「梁特」為愛女向機場人員「施壓」，大抵梁生冇乜人緣，機場及國泰前線人員對佢全無好感，主動向蘋果日報踢爆都唔定。坦白講，呢啲堅料，香港係得「蘋果」會擺上頭版嘅啫，有呢啲料，唔通會話俾梁粉報紙或死忠梁粉劉炳章聽咩。梁特千金唔見咗手提行李，照計入到禁區做安檢，將手袋擺入X光機檢查之時，一定會醒起件手提行李嘅，邊有咁大頭蝦㗎，除非當時阿媽為佢打點好所有一切，連自己去三藩市有冇手提行李都唔多覺嘅啫。但即使如此，同樣事情在外國一定發生過，總統/總理/部長級家人會有保鑣保護，知道老細千金唔記得帶行李入禁區，好快就有專人帶入去，冇人會出聲或向報紙投訴嘅，偏偏香港係一個特殊地方，梁特嘅民望又特別低，於是就有人故意放料搞大件事，令梁特尷尬。
香港現時最流行投訴文化，平民怨憤多，既然無權無勇（只有極少數人係勇武派），無論那一方面，總之執到權貴行使特權之事，就會主動向傳媒踢爆投訴，向廉記報案，務求搞到權貴雞毛鴨血，不得安寧。故此現時香港嘅權貴名人，如果醒目嘅，就要檢點吓，喺歐美可以享用嘅一般特權，喺香港係行唔通㗎，最好主動放棄，乖乖地依照規矩辦事，以免釀成公關災難。依家手機咁容易影video，名人分分鐘俾三唔識七嘅平民拍攝行蹤，偶一不慎，就容易成為新聞主角，如梁特家庭成員，硬係不時出事，佢地嘅思想觸覺似乎還是停留於1997之前噃！