一句「官到無求膽自大」，政務司司長林鄭月娥似乎想話畀大家聽心如止水，無諗過仕途更上一層樓，但觀乎佢近期嘅勇武表現、軟硬兼施，難怪有政界中人話唔信，覺得佢似乎仲有啲諗法噃！而佢前日親自北上出席選委會票倉民建聯「路向營」，以及受訪時大談下屆特首必須有班底，博到咁盡，自然又惹嚟唔少猜測！
單係噚日朝早，林鄭已經連走三場活動，有晒選特首所需嘅勤力同精力。佢先係出席喺啟德郵輪碼頭嘅「全城街馬」起步禮，同主禮嘉賓一齊鬼馬扮跑步（可惜起步禮時有跑手向林鄭倒豎手指，唔知係咪畀企喺隔籬嘅吳得掂，拖累咗呢？）；繼而參加喺九龍灣展貿舉行嘅「耆舞派對2016」啟動禮，同社區長者中心或安老院舍嘅過千位老友記歡聚。再之後踩入東涌迪士尼，參加「伴你高飛」嘉許禮，頒獎畀特殊學校傑出學生。嘩，老中青三代，一個朝早就冧晒！
緊跟阿爺 公開鬧港獨
軟銷之外，點少得硬淨嘢表明心志？林鄭前日「畀面」北上參加民建聯路向營，大談管治同議會拉布等問題。嗱，民建聯係特區政府最聽話嘅支持者，而且喺選委會有咁多票，如果要選特首，就梗係要搵定民建聯。
與此同時，林鄭接受電視台訪問時，大談下屆特首要有管治班子，而呢一樣嘢呢……咪係現任特首梁振英所欠缺㗎囉。係咪有的放矢？八方唔知，只知道呢，佢之前帶住政制及內地事務局長譚志源、財經事務及庫務局長陳家強同特首辦主任邱騰華等，同建制派及民主派議員傾調動議程，都幾有出巡嘅氣勢㗎。而阿爺最近炮轟嘅港獨呢，林鄭都公開話係錯事，要受譴責㗎，北大人聽落一定好like。睇林鄭軟硬嘢都做到齊，選特首未必一定唔肯制噃。
李八方
mailto:[email protected]