近期大打本土牌嘅財政司司長曾俊華，噚日喺網誌由馬來西亞檳城旅遊講到香港人身份。佢喺題為〈奇遇〉嘅文章度話，復活節假同家人到檳城旅遊，喺當地巧遇父母由台山到廣州時認識嘅舊友，憶述父母當年因為押後移民美國而留港，無心插柳決定咗佢同弟妹喺香港出生嘅命運，成為香港人；若父母如期赴美，佢哋就做美國華僑咯。
繼而佢就入正題，話香港好多人好似佢咁因着人生偶然，在港出生、成長，而無論呢啲人嚟自廣東、上海、福建或內地其他地方，都可以帶住自己文化同方言等在港落地生根，強調無論潮州佬、上海婆抑或台山阿伯，識唔識講純正廣東話、食廣東菜、唱廣東歌，都唔成為「香港人」嘅障礙。佢話𠵱家社會上有人嘗試將「香港人」身份作教條式定義，強要辨別誰「是／不是香港人」，忽略咗香港社會嘅多元本質，指呢種爭論唔會得到實在嘅結論，反會挑起永無休止嘅矛盾和爭拗，毫無意義囉。話時話，佢着住件狗狗tee，唔通又係想劍指689？