你身邊有無朋友都係咁？拍拖後立即無自由失自由，別人是跌進愛情墳場走去結婚，他是拍拖後要刎別自由。說好的高度自治，變成了高度自願被管治，鬼咩他情人名叫控制狂。衣食住行見咩朋友幾點瞓，一一管住晒。為免人類再次陷入控制狂的魔掌，臨床心理學宇Seth Meyers 點明了控制狂的三大特徵，以後大家未拍拖時留意到的話，要小心小心。除非你是成龍，覺得被管都好合理，咁唯有恭喜你啦係咪。
一、成日指正其他人錯，兼嗌交永遠要嗌贏
控制狂總係會好想好想點醒別人，喂你錯咗呀。「嗰字唔係咁讀㗎！」、「點會係咁做㗎？」、「嗰次唔係你講咁樣㗎，明明就係乜乜乜」，呢啲對白如果成日出自某人口中，那你記住一點，點解會有人成日提住其他人錯乜錯物，憑咩先？憑佢覺得自己永遠是對的囉，咁佢咪有資格提醒世人囉。Well，係控制狂咁覺得囉，其他人無需認同，不過若然你唔小心同佢哋嘈起上嚟，咁佢哋肯肯定要嘈到最後，不到勝利勢不休。
二、死不認錯
控制狂總係覺得自己比世人更優勝，更是絕對不會犯錯，所以世人係應該要聽晒佢講嘅。咁所以就算當你兜口兜面講明白，控制狂你錯了。無論是大錯小錯，佢都一定唔會認，佢哋心諗「我認咗錯，你哋以後咪會捉住呢點嚟入我？」，又或者「認錯咪等於認自己蠢。」所以佢哋一定要好認同：「犯規唔一定係錯，錯嘅可以係規矩本身。」
三、揸車時唔耐煩易燥底
如果對方揸車跟你約會，緊記要好好留意他在車上的情緒變化。因為控制狂深信自己是真理，講揸車無人比得佢，其他路上駕駛者都係唔識揸車嘅，分分鐘都在評論人哋揸得有幾差，由0至100的憤怒度隨時只需一秒，例如前面架車紅綠燈前慢速，連帶佢都過唔到。又或者你提佢前面轉左會快啲，佢只會覺得你阻住佢。而且一定會無耐性，佢就係皇，佢要控制一切，其他人做啲乜只要影響到佢，就一定是錯，使乜畀耐性出嚟。
資料來源：Psychology Today
記者：黃力