【爆相爆片】
草蜢昨早以大使身份到啟德郵輪碼頭，首次參與10公里街跑賽事，成員蔡一智在家食了兩碗飯預先填飽肚，笑言帶了兩隻蕉給蔡一傑，蘇志威（阿細）到場才知沒早餐吃，阿細還輕鬆說：「惟有一陣每個水站停一停，睇吓有冇嘢食。」由於前日有港跑手在韓國跑馬拉松猝死，傑仔叮囑大家要做足熱身，預祝大家安全完成賽事。
小慧有預感
怎知空肚落場的阿細卻出事，跑到8、9公里時突然暈倒，被送到聯合醫院急症室，讀者盧小姐透過本報「爆相爆片」直擊阿細出事情況，相中的他面青唇白腳浮浮，擘大口唞氣好辛苦，一名男工作人員緊張地扶着他，身旁的外籍跑手都邊跑邊望着阿細。盧小姐的老公接受電話訪問時表示自己當時在跑半馬，老婆幫他拍照時發現阿細不適：「嗰時差唔多返到終點直路，見到佢面青唇白，工作人員問佢使唔使幫手？佢話唔使，仲堅持要跑到尾，喺冇人攙扶下再跑咗一段路。」
阿細被送院後，老婆劉小慧趕到醫院陪伴，她接受本報電話訪問說：「佢冇事，我諗頭先佢早起身，人哋慢跑佢又爆炸力，加上又落雨，加加埋埋暈低咗，以前都未試過，𠵱家喺急症室等X光報告，吊埋鹽水應該冇嘢出得院，佢清醒㗎，係頭先暈低完醒番有啲唔清醒。」
問到接到消息是否嚇死了？小慧說：「咁又冇喎，我一直好正面，噚晚我已經有呢啲畫面出現，不過我諗住應該唔係。」是否預感老公會出事？小慧說：「因為我覺得夜瞓，同埋我知佢性格，一到運動呢啲位佢會搏老命，佢一直有做運動，但冇做呢啲咁持續嘅運動，唔係跑開馬拉松唔可以咁搏老命，佢都話今次跑得太快所以出事，我又唔係好擔心，我覺得係會冇事。」
淋雨致冷親
阿細經休息後親自報平安：「今朝參加街馬準備不足，同埋今日天氣落雨，我最怕淋雨，冷親，所以跑到8、9K咁上下突然暈倒，但𠵱家冇事清醒番，多謝各位關心。」大會公關表示阿細在賽事中途感不適，並由工作人員送回起點休息，大會以安全着想將他送往聯合醫院檢查，阿細並沒有任何跌傷。
採訪、攝影：馬建華
