上班族對公司的歸屬感與工作效率息息相關，外國有研究指出發現員工可帶寵物上班，有助增加對公司的歸屬感，工作自然得心應手，但要讓貓狗等寵物在辦公室走來走去似乎有點難度，精神科醫生建議「規矩多多」的公司可考慮放鬆無理規條，如容許員工在辦公桌放上家庭、同事或朋友合照，或喜歡的飾物或盤栽，「(員工)覺得個位係屬於佢嘅，做做吓嘢好苦悶，突然間望吓鍾意嘅嘢，其實可以提升士氣」。
記者：陳沛冰
精神科專科醫生歐陽國樑表示，僱主想增加員工的公司歸屬感，提升士氣，其實未必需要大費周章，特別是不應訂立太多規矩，本港的公司未必容許員工帶寵物或子女上班，但僱主可以退一步想，在不影響公司運作及干擾他人下，如容許員工佈置辦公桌，放置家人、朋友或旅遊等相片、喜歡的飾物或盤栽等；或在電腦螢幕保護屏上顯示子女的相片，「覺得環境屬於佢，隨時可以睇到佢鍾意嘅人物或者飾物，會容易開心啲。」
歐陽國樑表示，若公司太多規矩，在管理上太執著，反而會有反效果，曾有病人求醫時投訴僱主太嚴苛，「樣樣嘢都管，張枱點擺又管，好少嘅嘢都管，會增加員工同上司嘅磨擦」。他指，尤其日常工作苦悶及重覆，「可以偷偷哋望吓屋企人，望吓鍾意嘅事物，會容易放鬆個人，少啲焦慮、壓力，可提高工作效率」。
但未必所有工種的打工仔都有自己的辦公桌，如食肆收銀員，工作範圍只在收銀處，或與其他待應一樣只有自己的儲物櫃。歐陽國樑表示，外國不少食肆容許員工在收銀處有小量佈置，「畫一個小小嘅公仔，好簡單花紋，貼個攪笑貼子，俾員工自己設計，又唔需要好多錢，可以令員工開心啲，地方好有生氣」。售貨員及待應等可能只有一個小小的儲物櫃，一般都貼有私人相片等，「僱主可以俾多小小地方，員工有私人空間放小小自己嘢」。