女見習生蔣嘉琦暫時逢出賽都受讓10磅，加上佢騎技日趨成熟，於是越來越多練馬師搵佢減磅出擊，苗禮德係箇中一大知音人。早排阿苗將「快寶駒」初配嘉琦妹即贏直路賽，這天騎練共有兩駒合作，結果第四場四班草地1200米率先勝出「至尊飛星」。
「至尊飛星」之前季內跑來跑去得個桔，包括上仗用黃皓楠減七磅得第五，呢次用嘉琦妹減夠十磅，早段使出人馬同樣最拿手的放鳶戰術，貼欄且放且留，拉士雖一度被外側的「萬事欣」超越，但人馬成功回氣反敗為勝，結果全場最老年屆八歲的「至尊飛星」爆16倍冷Win打開今季勝門，組合獨贏A2派31.5元。而「至尊飛星」是苗禮德在港第500場頭馬，可喜可賀。
韋達之「萬事欣」功敗垂成屈居亞軍，第三名由雷景勳大冷門「君子承諾」失驚無神後上拎到，位置派到294.5元，次熱門田泰安「快樂火龍」跑梗頸四，已好過1.7倍大熱輸到只得第九的雷神座騎「索先生」。