香港青年扭氣球，扭出冠軍！被譽為「氣球界奧斯卡」嘅世界扭氣球大賽前日喺美國舉行，3名香港青年擊敗全球60個國家地區、逾800名氣球師，成為首支港人隊伍，攞到扭氣球世界冠軍，揚威海外，認真巴閉。佢哋嘅巨型氣球作品名為「海王」，闊183cm、長183cm、高280cm。隊員先喺透明氣球內染色，再造出波浪效果，另外加上聲效感應同背景音樂、燈光，觀眾走近作品時，海王仲會發出叫喊聲。
籌備3個月 比賽12個鐘
3名參賽港人、一名澳門人同一名台灣人以港隊名義參賽，全部係30歲以下，為咗參加呢次比賽耗盡儲蓄，每人平均自費4萬元遠赴美國參賽，並花咗3個月時間籌備比賽，賽前仲飛到台灣集訓一星期。呢個比賽長達12個鐘，佢哋期間「不停做，只喝水」，最終奪冠。
其中一名成員Manson Lam喺facebook向家人、朋友報喜，指「氣球編織神話」，又感謝一直支持佢哋嘅朋友，「一路以來，我的用心，努力，到今日終於有成績，對於自己對於家人我亦有所交代」。佢仲特別多謝哥哥，「感謝唔知有冇勝算，都肯借錢嚟畀我賭一次嘅阿哥」。