如果要講城中富豪嘅新抱，恒基地產（012）主席李兆基嗰位「千億新抱」徐子淇肯定最為高調，其他富豪嘅新抱平日都甚少曝光，難得嘉華集團老闆呂志和日前畀新抱李天慧為集團舉辦嘅廚藝大賽擔任評判，高調見人。
𠵱家好多企業都鍾意搞活動增加員工歸屬感，嘉華集團亦唔例外，日前首次舉辦「嘉華廚神大賽」，並搵來集團旗下四大業務嘅員工參加。
佢哋四瓣業務包括做賭嘅銀娛（027）、做地產嘅嘉華國際（173）、嘉華建材，同埋仕德福國際酒店集團，結果由嘉華建材嘅同事贏出。而擔任今次比賽評判嘅，就包括呂志和新抱李天慧，佢係呂志和三公子呂耀華嘅太太，樣子清秀，聞說係少奶奶一名，不過見佢右手手腕包紮住，呢個傷勢多數係抱BB整親，又或者係入廚煮飯弄傷，唔知呂太因乜事受傷呢？