容祖兒、李克勤和李玟有份參與的《我是歌手4》前晚在內地舉行總決賽，祖兒於首輪被淘汰出局，令網民大感詫異，其後克勤亦三甲不入，由李玟成為歌后，結果內地網民即狂洗版，怒轟湖南衛視造馬，甚至有指祖兒出局後觀眾即熄機唔睇，致收視插水。
有份為師姐「幫幫唱」的陳偉霆事後在微博留言說：「抱歉沒能幫上，u are the best forever！師姐！」男友劉浩龍更公開留言安慰說：「妳是最好的！」
昨返港交人
祖兒和克勤昨日從長沙返港，問他們對於今次的賽果的意見？克勤說：「我覺得大家已經盡咗最大嘅努力，我覺得引以為榮。我覺得每個人心目中都有佢自己嘅歌王歌后，冇可能滿足晒所有人。」祖兒亦說：「其實我好多謝陳偉霆嘅，佢喺最忙嘅時間交到最好嘅嘢出嚟，我好滿意。我亦都睇到大家好支持我，雖然我係入唔到第二回，但係我覺得唔係計呢啲嘢。」
對於有網民覺得有黑幕，克勤說：「如果你真係要參加，呢樣嘢你應該之前諗啦，𠵱家過去咗就唔好諗喇，我哋唔諗呢啲。」
提到劉浩龍的冧爆宣言，祖兒笑稱要交由當事人回應，但克勤忍不住大爆：「我就唔知啦，總之我見到某人睇到電話之後，好甜咁樣笑囉。同我好大對比。」原來克勤的囝囝病了，收到電話後歸心似箭，想盡快返家「交人」和照顧囝囝。
採訪：羅慧敏
攝影：陳慧安