【本報訊】教育局局長吳克儉日前反口稱難以達到學生零功課，有學校及團體就針對學童功課壓力過大自行舉辦「無功課日」，活動舉辦團體發言人希望活動可讓學生「搵番佢哋嘅學習空間同學習興趣」。
記者：葉偉東
香港基督教服務處深東樂Teen會與香港四邑商工總會新會商會學校於4月29日至5月2日舉辦無功課日。學校通告提及因應學童功課壓力過大，以及家長因功課問題而與子女發生磨擦的情況而舉辦無功課日。
香港基督教服務處深東樂Teen會服務主任朱麗英稱，小學生無功課日活動原意是希望學生找回自主空間，「𠵱家啲學生好多功課，星期五因為放假有時仲可能多啲㖭，咁星期五做唔晒，星期六、日都要做，根本冇時間玩，平日放學都係咁」。
朱麗英表示不少家長亦因功課而與子女出現磨擦，「咁小朋友想玩，又或者唔識做、唔想做，啲家長又會扯火要佢哋做晒功課先，自然就會嘈，影響親子關係」。
朱寄望無功課日活動可讓學生放學後擁有自主空閒，「教佢時間管理，等佢哋放學後可以做啲自己想做嘅事」。朱又稱2月已經舉辦過相似的活動，惟表示如果長期要像台北市寒假沒功課，「咁就係教育制度嘅問題，都希望吳局長可以檢視吓個情況，諗吓教育係一回點嘅事，點解啲學生𠵱家學習得特別唔開心」。
父母嘆子女讀到喊
有受訪家長周太表示如真有無功課日，作為家長也會好開心，「唔使咁勞氣，同埋有時小朋友唔鍾意做功課就會發脾氣，家長都好辛苦」，其小學四年級兒子則直言：「如果係日日就好囉！」
家長Vicky接受訪問亦不禁高呼：「嘩好開心啊！」又稱周末時兒子功課的確較多，平日亦不止功課還有頻繁默書，家長也要花時間去與子女溫習，「其實唔忍心佢讀書讀到喊，佢哋真係好大壓力」，更稱如有無功課日會帶兒子去玩及見識不同事物，不再刻板學習。
