練馬師大摩近九次日賽均有馬贏，當中每次皆與莫雷拉合作勝出或入Q，總數17駒，取得六勝五位，上名率接近六成半，可見二人合作無間，雷神猶如大摩主帥！
周日(10日)賽事大摩一口氣將「再出奇」、「甜統」及「衝鋒友」交由莫雷拉執韁，前兩駒更有王牌在身，料可替大摩完成日賽十連勝紀錄。
第十一場二班1400米，「再出奇」至今曾一次配莫雷拉跑沙田，即取得在港唯一頭馬，今次再作相同部署，已睇得出求勝之決心。上仗配韋達孭頂磅133磅仍能拼入一席亞軍，今仗升班少負13磅，必可跑得更輕鬆，況且「再出奇」上季正是入Q後再出換雷神贏馬補中，提防會照辦煮碗出擊。
第五場四班1600米，「甜統」一月贏馬後雖然未能再添功，不過每次均在1400米追得接近，今仗毅然增程轉爭1600米，對這匹後上馬應有利追趕，換上莫雷拉可贏第二Win。
另外，第三場五班草地1200米，「衝鋒友」今季曾一次用莫雷拉上陣即於四班跑第四，今次初跑五班即回配此子壓陣，質新馬憑班利可贏馬反彈。