話說近日新盤多多，假如有意置業或視睇樓為消閒活動的朋友，肯定會好唔得閒。睇樓之餘，聽吓代理點sell盤，同時聽吓其他睇樓客點評個盤，都係另一種體會。
睇樓嗰陣，通常啲代理都會同你閒談，了解吓你嘅意向，遇上真心想搵樓嘅，通常都會幫你計掂條數，或者同你傾吓偈畀吓advice；遇上純粹睇樓嘅，一係借故挖苦你，或者留個junior的人「招呼」你。當然，不同代理都有獨門的sell客技巧，最經典嘅莫過於明知你冇興趣買，但都落力sell，假設你「𠵱家無，將來一定有」，務求等你有日發咗達會記住佢，小弟通常最欣賞呢類agent，將來可以推介畀讀者。
至於睇樓客的意見就更真實，最近有對家住何文田舊樓嘅夫婦參觀何文田新樓示範單位。當代理話三房單位個工作間好大，住喺間房嘅工人一定好幸福嗰陣，太太立即駁斥個代理「緊係唔係啦！我屋企個工人有好多雜物！呢間房肯定唔夠擺！」到代理表示客廳和睡房都好大嘅時候，太太不以為然，只放下一句「我哋住開嗰啲樓，睡房都冇咁細……」，代理惟有避重就輕，講吓新樓會所、廚廁設備有幾豪，希望令太太回心轉意，增加入票機會。
即使新樓個則劃得再靚，始終同舊樓有一段距離。雖然近年新樓只有實用面積，計算準則劃一；但是唔少新盤都有露台、工作平台、預製外牆或玻璃幕牆等設施，加上新盤廳巨房細，影響觀感，令不少舊樓居民對於新樓都有保留。
地產小子
http://propertykids.blogspot.hk/