早前去了澳洲，出席復活節周歲馬拍賣會的蘇保羅，返港後已恢復督操，周日(10日)沙田賽事，蘇保羅本來非常睇好出戰第11場配潘頓的「馬跑得」，蘇保羅話隻馬在港三戰全跑二至四名，忠心準繩，而且復課試大閘勝出大有進步，本預計今場有望建功，點知因為左前蹄不良於行已退出，非常可惜。
不過，蘇保羅話自己今期有一隻秘密武器，足以一鳴驚人，就係插四班初出，跑第六場1000米直路賽之「勇勝王」，隻馬有幾勁？先講血統，父親「飛快龍」係澳洲短途馬王，曾取得15場頭馬，兩歲時頭七場全勝，三度來港出爭香港短途錦標，2000及2001年兩奪此項錦標，2002年就跑第三。
「勇勝王」來港前曾試閘4次，全部名次非一即二，而來港後亦4度試閘，同樣全入三甲得兩冠兩亞，完全遺傳到父親「飛快龍」早熟特性。蘇保羅亦話「勇勝王」進度非常好，有足夠成熟程度同狀態爭勝，希望可以一如「實力飛駒」、「華盛高飛」咁，一出即取得佳績喎！