【文化籽：西遊記】
ViuTV開台，睇足半粒鐘預告先入戲肉，係好無癮。都請大家繼續睇啦。否則，新電視台頂唔住，火速玩完，又會俾有識之士批評：「以前唔見你珍惜，到關門大吉，你先扮懷念？」
幾年前，在《壹週刊》工作，無綫還未霸道到封殺壹傳媒，我負責撰寫電視節目介紹。一星期七日，一日三至四格，每格幾十字，簡介一下電視節目內容。寫甚麼好？好倚賴電視台寄來的新聞稿提供資料。新聞稿一般來說不會有甚麼吸引。惟有自行創作改造。很多時，搞到文字跟節目，根本毫無關係。
部份讀者開始質疑，究竟寫稿的人有冇睇電視。我肯定地回答：有。多得阿媽，即方太，她沒有甚麼嗜好，最愛睇電視，尤其無綫電視。如果在陶大宇羅嘉良最當紅的年代，你跟她說無綫壞話，她輕則黑面，重則反駁，更嚴重者，可以跟你絕交唔係講笑。我一度以為方太私藏大量電視廣播（511）的股份。可惜，沒有。
追隨家規，我也只好選擇無綫。直到，有線開台，要睇波，我立即成為訂戶。即使現時有線只剩下深宵直播的歐聯具吸引力，為了支持新聞台，我仍然按時付月費。到now TV搶了英超播映權，我又迫於無奈安裝。安裝now TV，可以訂閱無綫收費頻道，方太話非常方便，以後唔怕煲劇煲漏一集，第二朝就可以重溫。我又訂埋無綫收費台的套餐。不經不覺，屋企部電視真係乜台都有。
全盛時期，方太日煲十劇。朝早，睇有線劇集台重播又重播的師奶韓劇，報仇報仇同報仇。下午，睇華語劇台的大陸宮廷劇，勾心鬥角與勾心鬥角。之後，輪到經典台。有時，日劇台重播《阿信的故事》或者播《海女》，啱口味，又追。翡翠台下午重播舊劇，再睇。到黃金時段，三線劇，走唔甩。晚上十點半，還有精力轉去明珠台睇配音美劇。問你服未？
換句話說，只要我身在客廳，係好難唔睇電視。我寫了十幾年電視節目介紹，評語大部份來自方太金口。直到近幾年，方太終於覺悟，或者是忍無可忍，竟然對無綫產生微言。很多劇集，她終於狠心放棄。新潮一點複雜一點的《潮流教主》或者《EU超時任務》，她固然頂唔順。老土如《愛．回家》，她也捱唔住馬家的教育電視。原因？很簡單也很合理：「啲劇，好難睇呀！」
所以，ViuTV開台，主打真人騷，人人讚好。我力排眾議，堅持應該開劇，仲要開師奶劇，有咁婆媽得咁婆媽。《跟住矛盾去旅行》，係創新係吸引，無睇過電視的，到最後，始終會上網睇㗎，始終搶唔到無綫客源。《瑪嘉烈與大衛》，更加適合放在Netflix，一次過放齊一季。常說今時今日還會坐定定觀看電視的，盡是不願改變的一群。要他們由喜歡黎耀祥突然變成喜歡夜魔俠，是有點困難，不過連超級死忠方太都感受到無綫出品有幾爛，只要市場上有質素較好的同類貨物，我又唔覺得無綫播雪花，一樣有慣性收視。
翻看ViuTV節目表，暫時來說，被寄以厚望的，應該是《太陽的後裔》。韓粉一早網上搞掂啦，點會等？會等的，無錯，又係方太一類的觀眾，要聽廣東話唔想睇字幕的觀眾。繁體字幕是賣點，粵語配音當然更值得大力宣傳。韓劇質素參差，不妨考慮美劇。不要懷疑師奶對美劇的接受能力。拿方太為例，她是《欲骨查》（Bones）、《賈神探》（Castle）、《「法」妻》（The Good Wife）的忠實擁躉。《心計》（The Mentalist）播到第六季，方太終於知道邪惡大佬紅約翰的真身，開心到呢。點知，第七季，無綫竟然無再配音，你想像到方太的憤怒、難過和遺憾嗎？如果，ViuTV肯做好心，爭奪《心計》版權，然後配上粵語，我敢寫包單方氏一家必定晚晚99。（編按：99為ViuTV頻道號碼）
為針對師奶觀眾，揀美劇，先要戒角色眾多劇情複雜的，所以，《權力遊戲》（Game of Thrones）再好睇，也不適合。又不可以挑選跟美國本土或歷史的關係太緊密，例如J.J. Abrams監製，講述高中老師超越時空拯救甘迺迪總統的《11.22.63》。題材無需刻意創新，內涵最好別太深奧。以此作準則，我強烈推介ViuTV購入ABC新美劇《The Catch》。先旨聲明，我未睇，純睇節目簡介：美女私家偵探個未婚夫呃咗佢幾百萬美金後消失無蹤，她與偵探社的團隊一路調查不同的謀殺案，一路尋找未婚夫下落。未婚夫其實是個職業老千，為求自保，出盡方法設計不同騙局跟未婚妻貓捉老鼠。製作單位包括Shonda Rhimes，成名作是《醫人當自強》（Grey's Anatomy），要幾煽情有幾煽情，好啱香港人口味。何況，以兩夫婦的角力作重心，根本就是香港電視劇的王道。現實都係，梁太在機場發難，梁先生，呀唔係，係梁特首，出盡奶力為妻出頭，香港市民睇呢場戲睇得幾投入幾咬牙切齒？ViuTV，信我啦，買多啲美劇返來，將粵語配音盡量加入本地元素，索性幫角色起個中文名，似時下荷李活電影的中文字幕做法。莫講話去返九十年代《仁心仁術》（ER）的受歡迎程度，去返八十年代《豪門恩怨》（Dynasty）的高潮，都不是不可能呀！
撰文：方俊傑
觀塘長大，壹仔打滾，偏愛西片、西劇、中日韓美女。利物浦悲慘球迷，非西人一個。facebook專頁：方俊傑
編輯：陳漢榮
美術：吳子豪