演唱會有炒黃牛飛唔係咩新鮮事，不過為咗打擊呢樣，竟然要用臉部識別先至入到場？朝日新聞噚日就報道，講到日本人氣組合嵐，黎緊今個月23日舉行嘅全國巡迴演唱會「ARASHI "Japonism Show" in ARENA」門票，早前係Fans club通訊入面已經確認將會採用臉部識別入場系統，買飛時要提供個人近照，到時入場系統就會根據相片而認證面部識別，報道仲話個系統精確度可以去到99.9%，係咪咁勁就未知，不過嵐嘅演唱會門票一直堪稱全日本「最難到手」，聽講買飛要加入歌迷會先可以抽飛，因為門票勁難入手，所以粉絲會用盡家人、朋友的名字入會，務求漁翁撒網，不過曾經有人喺twitter呻過，用咗27個名都抽唔到。要用到咁高科技搞咁多野，無非都係為咗打擊黃牛網上拍賣轉售圖利，畢竟一張10000日元(約714港元)嘅門票，可以畀人炒到幾十萬日元，都咪話炒家唔和味！
資料來源：朝日新聞
記者：余瑋