去年尾加入中聯辦、出任法律部部長嘅清華大學法學院院長王振民，返咗新工都成季，一直身兼兩職。噚日佢出席一個論壇時自爆，清華法學院好快就有新院長喎。唔知有「小護法」之稱嘅王振民，全心做部長之後會唔會多啲「糾正」大家對《基本法》嘅認識呢？
王振民昨續以院長身份出席論壇，佢發言時好隱晦咁提到自己喺香港有個職位，但仲係清華教授，而且係法學院院長，不過好快就會有一位新院長上場，相信幾個星期後就會公佈。王振民返新工之後唔多露面，頂多做吓鍵盤戰士寫文，但就被立法會主席曾鈺成KO。八方噚日見到部長，諗住問小護法攞張新卡片，可惜食咗檸檬囉。