【旅遊籽：假日散心】
返工坐足五日辦公室，假日最好去戶外散心。在歐美，放假人人衝到沙灘曬太陽，部份沙灘仲有運動器材任玩。香港沙灘冇運動器材，但山頂竟然有！在香港西北最高山峯青山，有瘋狂行山友在583米高山頂自設健身器械。任職消防處體能訓練導師的周傑玩了九年，邊舉自製啞鈴邊遠眺青山腹地及龍鼓灘，如此開闊靚景的健身場實屬罕見，仲要毋須會籍，冇sales煩你。行山加健身，原來有得諗。
青山 土炮健身場 有齊單雙槓同啞鈴
睡意是行山最大敵人，當日我死撐起身，清早跟周傑沿青山禪院上山。青山是他的後花園，中學時代起已在青山玩越野跑，有做開運動的話，上山路段其實唔難行，瞌眼瞓的我和滿身器材的攝影師，約兩個多小時已攻上山頂，當元朗、屯門及青山灣全景突入眼簾，睡意即時消失，身水身汗都值得。
山頂訊號站附近竟然有個土炮健身場，有熱血行山友在山頂空地設置健身器械。周傑跑入空地，練習引體上升。「呢堆器械大約九年前出現，開頭只得單槓同雙槓，後來啞鈴、槓鈴同爬梯逐樣出現。」單槓及雙槓玩落幾穩陣，啞鈴及槓鈴由石屎及鐵枝造成，估計是行山友自攜材料上山製作。望落簡陋，但一眾行山友見慣不怪，經過都會舉兩舉。健身空地面對珠江口，眼前是青山腹地，可惜之前遭山火燒得光禿禿，一片綠海慘變荒漠。若無煙霞，從空地遠眺可見龍鼓洲。他補充：「青山腹地以前係英軍練靶場，𠵱家偶爾會有解放軍訓練，沿途有機會發現子彈殼。」若見紅旗，即有可能進行射擊訓練，切勿進入腹地範圍。
山頂器械當然不夠健身室全面，但勝在有陽光同清新空氣，跟大自然同呼同吸，似番放假。周傑平日工作負責訓練消防員及救護員體能，放假寧願跑山，順便上山健身。「有山頂場地畀大家做運動都好，小朋友、老人家仲可以去公園運動吓，但成年人就太少場地做街頭健身（street workout），想搵支單槓做引體上升都難。」
經菠蘿山往下白泥 賞世界級日落
土炮健身場另一好處是毋須連交幾十個月會費，「健身邊使用錢，行上山可以訓練心肺功能同下肢，上到山頂玩單雙槓鍛煉埋上身肌肉，成件事幾完美。」開闊美景還有治癒作用，「有時情緒低落，我都會上山睇風景做運動，好快就冇事。」健身完畢，如想看世界級日落，落山時可往菠蘿山方向前進，沿途陡斜又多碎石浮沙，頗有挑戰性，部份路段要手腳並用，盡顯行山樂趣。穿過菠蘿山沿稔灣路走，可到下白泥觀賞日落，但新手就最好原路折返，經青山禪院落山。
屯門 健身徑 14種設施 方便行山友即興健身
除青山山頂，香港山野仲隱藏其他健身設施。漁護署在屯門（大欖）、香港仔、龍虎山等郊野公園建造了七條健身徑，本意當然是供人行山時順便健身。設施都幾多樣化，以屯門健身徑為例，闊落易行的路徑有14種健身設施，包括仰卧坐起凳、掌上壓支架、單雙槓、梅花樁等等，不過部份設施有點不明所以，如單立定跳高柱、平衡木，好似對健身作用不大，眼見晨運客都好少使用。
「Barkids」街頭健身導師伍子奇試玩屯門健身徑，他認為設施雖多，但以街頭健身來講，原來一支單槓就夠，他指：「一支單槓都練到多組動作，練到好多組肌肉，配合掌上壓輔助器，喺身體平衡、肌肉耐力訓練方面，甚至好過喺健身室做器械訓練，操完身體線條亦都較自然。」不過他說多數街頭健身愛好者都甚少上山，「街頭健身講求方便，健身徑應該只方便到行山友隨時隨地興起練習。」
記者：臧諾
攝影：劉永發
編輯：陳漢榮
美術：吳子豪