2004年上映電影《希特拉的最後十二夜》（《Der Untergang》）中希特拉拍枱咆哮手震除眼鏡一幕，網民看出喜感，連環惡搞，成功把他變成萬能key，遇上可怒也之事──cut唔到有線、睇唔到維基台、林𥧌攞最受歡迎男歌手等等，都要請希特拉再三以表情演繹怒意。
當然，這都不能改變他是納粹殺人狂魔的史實，如果他穿越時空來到現代，你又笑唔笑得出？電影《Look Who’s Back》改編自Timur Vermes同名幽默小說，正正講述呢個惡人穿越時空70年，來到21世紀的柏林！預告片中看到他不知滑鼠為何物，有人教他上Google搜尋如何「統治世界」，非常抵死。佢着軍服在德國街頭出現，大家只當佢係街頭藝人，仲同佢叫口號式打招呼兼selfie。佢之後誤打誤撞入咗電視台做嘢，周街同人講民主，成為媒體寵兒。電影在德國大賣，收了近兩億港元票房。其實電影並非要在傷口灑鹽，反而希望諷刺世人不要重複犯錯，意大利更有電影人表示有興趣拍墨索里尼版穿越時空，唔知神州有冇人想拍番齣《毛主席在強國2016》？
可惜的是Netflix買了德國以外的上映權，亞洲地區只限日本和台灣。電影在台灣譯作《吸特樂回來了！》，日前正式公映，香港觀眾暫未有觀賞渠道。
電影預告： https://www.youtube.com/watch?v=szogzTuYbOw
記者：葉青霞
資料來源：DEADLINE HOLLYWOOD
