近年世界各地越來越多恐襲，香港紅十字會搞咗個「人道教育中心」，透過主題式展覽同探索活動推廣人道關懷。中心仲有全亞洲首個模擬戰區教室，參加者可以角色扮演戰火中嘅士兵同難民，猶如置身於戰場，了解打仗嘅禍害同人道概念。
模擬戰區教室「戰區90」設有多個關卡，參加者會喺90分鐘經歷一次戰爭的過程，活動包括喺黑房內睇戰爭片、困喺囚室裏面聽古仔同參觀尋人中心等等。
紅十字國際委員會主席毛雷爾參觀中心嗰時話，香港地好多人都未經歷過戰爭，佢希望中心可以教育下一代戰爭嘅禍害，又話人道精神雖然唔係與生俱來，但絕對可以學。中心由下星期五起接受網上預約，仲特設周末同晚間場次畀打工仔參觀。