電視大戰一觸即發！受廢青熱捧的毛記電視慶祝1歲生日，將於下月11日在會展舉行「萬千呃Like賀台慶2016」，毛記腦細林日曦昨在荃灣的總部接受本報訪問，披露台慶將搞視帝視后選舉，但只限內部幾人投票，揚言絕對公平公正。
視帝暗盤撐東方昇
林日曦面無笑容說：「我哋會頒發視帝視后，真㗎，好認真，但冇投票，我自己一票，我哋幾個幾票，好公正，公開投票都未必真係投票，所以我哋慳番唔做。」問到視帝視后走勢？他說：「視帝方面Dickson帶咗出嚟少少，因為東方昇風頭俾佢搶過咗。視后方面利君牙、盤菜瑩子同黃慘盈叮噹馬頭，不過我投羅若off一票，畀吓機會小朋友，視帝暗盤我支持東方昇，因為佢啲演技夠浮誇。」
攞視帝視后是否要好似無綫般簽十年合約？林日曦抵死說：「唔簽，𠵱家年代多電視台，有毛記、無綫、ViuTV、港台，遲啲可能HKTV會返嚟，其實應該多平台，有蘋果咁樣，冇話一個玩晒，唔會簽人十年。」
至於台慶節目則玩盡無綫和亞視，包括有台慶亮燈和堅．掟壽包，林日曦說：「掟兩個鐘頭壽包，同亞視唔同，觀眾都有得掟番轉頭。其他主播會有亡命表演，吞吓火吞吓炭踩吓鋼線，總之預咗會死嘅表演，睇吓邊個唔怕死。。」
門票將於下周一公開發售，林日曦為避飛債連WhatsApp名都註明「利申：冇飛」，他說：「一般演唱會通常得兩、三成出街賣，啲人反映好唔開心，今次專登留過半數出嚟，所有人問我都係冇飛。」
採訪：皓騫
攝影：陳順禎
