影帝黃秋生和舞台劇《狂揪夫妻》好對手甄詠蓓第三年聯手授徒，為演藝界用心傳承，報名上堂的不乏藝人，即使他們都有一定知名度，但在秋生眼中全部nothing，要求嚴格的他希望學生放下身段來學演技，一旦發現對方無心上課，直言會叫對方買定棺材，甄詠蓓就讚激將法有用，令學生成材。
撰文：比華利
影視和舞台劇界都稱帝的黃秋生，與舞台劇導演兼演員甄詠蓓（Olivia）下月又再聯手開班授戲，教學相長。秋生惡相往往嚇窒學生，他與甄詠蓓接受本報專訪時衝口而出：「有啲人天資所限，精神異常，點同佢講？只能說唱遊過咗咪算。」
秋生因材施教，Olivia大爆他會為學生發竧𣉢：「教唔好學生，秋生會瞓唔着。」秋生解釋：「挫敗感唔係喺學生身上，我會覺得喺自己度，係咪我表達能力有問題？判錯症落錯藥。」秋生一旦斷定學生沒得救，他會不留情面：「叫佢返屋企買定棺材。」Olivia指秋生是用激將法激發學生潛能，嚴師出高徒，秋生自辯：「我個海膽樣，冇人敢亂嚟。我唔係生成咁惡，惡係後天形成。嚴格擺喺要求度，唔係態度上。」
課後元氣大傷
影后林嘉欣、張敬軒、蔡思貝和沈卓盈等都先後拜師學戲，兩人評價星級學生，秋生即揶揄：「劉德華冇嚟，郭富城又冇嚟，𠵱家啲後生演過兩部戲就當自己係星，我哋幾十年，佢哋點可能喺我面前話係星，星你兩巴。」眾星點將，Olivia讚軒仔聰明兼有悟性：「佢好複雜，裏面好多嘢發掘。」秋生也認同軒仔有層次：「佢肯去探索，夠敏感夠瘋狂。」
蔡思貝又如何？秋生說：「佢本身材料好，有啲嘢未發掘出嚟，要下啲苦功。」他擔心沒人對蔡思貝要求就難助她成大器。眾學生當中，以林嘉欣最勤力，Olivia說：「佢認真用功，好沉醉演戲。即使有經驗，又係影后，但得閒仲會不停進修。」
Olivia指秋生每次完成兩周的課堂都筋疲力竭，臉現灰黑兼落型，他說：「我吸晒學生啲負能量，佢哋好多垃圾嘢，好多雜質，我就似用鹽水洗水晶咁樣，元氣大傷。」教戲如同心理治療，秋生希望透過氣場，提升學生人生，他說：「我鍾意教，但教得多會變hea，一年一次差唔多。」
秋生所言，付出與收入似不相稱，他抵死說：「嗰啲錢夠買吓補品，買吓香薰嚟點，我每次教完課，起碼兩星期先恢復元氣。呢啲係興趣同理想，又為吓整個行業，唔會咁巴之閉話傳承，冇咁偉大，賺少少又搵吓笨，乜都有啲啦。」
化妝：Jolinn Ng
髮型：Jeff Wu、Phoenix Ng
服裝：bauhaus（黃秋生）、The Surian（甄詠蓓）
場地：演藝學院
