自從北京吹起一片和諧風，加上港澳研究會副會長劉兆佳話，中央要求下屆特首做好團結同化解矛盾工作，爭取連任嘅特首梁振英固然收火，呢排冇乜再撩交打，連疑似有機會入閘選下屆特首嘅人，好似政務司司長林鄭月娥、新民黨主席葉劉淑儀，都擺出同反對陣營有偈傾嘅姿態，至於另一盛傳會跑馬仔嘅財政司司長曾俊華，噚日就約咗民主黨去官邸食飯。
名為預算案拉票
話說呢餐飯陣容鼎盛，除咗請民主黨主席劉慧卿等全體立會議員，仲有兩個副主席羅健熙、尹兆堅、司庫袁海文、秘書長李永成，即係成個民主黨領導層都請，據聞席間無所不談，由香港政治到巴拿馬文件都有傾。有與會者同八方講，佢估鬍鬚曾呢餐飯名義上為預算案拉票，但請咁多人，梗係唔止咁簡單，無非想打好同民主黨、特別係未來接班人關係，順便拉埋人情票，萬一鬍鬚曾真係跑馬仔就有用。
亦有民主黨中人同八方分析，論能力林鄭絕不輸蝕過鬍鬚曾，可惜跟車太貼，之前喺立法會同泛民紮馬，又話官到無求膽自大，講團結和諧就唔及鬍鬚曾，所以林鄭亦都改變作風，早排同泛民傾調動立會議程，對泛民要求雖未至有求必應，但都肯接受，無非做畀中央睇，唔止鬍鬚曾搞得掂泛民，佢林鄭都得。
至於葉劉更加唔使講，論能力同泛民關係都及唔上林鄭、鬍鬚曾，要有力突圍而出，就要諗諗計，所以民主黨中人話，葉劉就不惜兵行險着，邀約香港民族黨見面，就係想畀人知佢連港獨陣營都肯見，絕對比林鄭、鬍鬚曾更有心有力搞和諧。
李八方
mailto:[email protected]