亞視在上星期熄機，昨晚剛是「頭七」的日子，湊巧一班亞視前藝人與幕後職員組成的「A記同學會」在尖沙嘴舉行周年聚會，出席前亞視藝人有江美儀、陳煒、劉錫賢、蔡國威、朱慧珊、顏子菲、林祖輝、秦啟維等。
已投身無綫的江美儀笑言「頭七」聚會：「頭七食餐勁，冇諗過呢樣嘢，本身搵場地要大，同埋呢個環境熟悉，呢個活動唔關亞視事，只係大家舊同事聚會，可能之前在職嘅同事會感慨啲。」美儀認為亞視終於終結是一件好事：「梗好啲，成日畀希望人哋，𠵱家完咗，唔使再留戀，再請番人就另一件事，欠人錢要還咗先，我噚日見到勞工處有活動招聘廣播界人手，月薪有8千到4萬，希望佢哋會先考慮亞視員工應徵，因為佢哋之前對公司不離不棄，去邊度搵，係用得過。」美儀亦有留意ViuTV開台，認為節目有新鮮感，希望有良性競爭，可以令行業百花齊放。
蔡國威：冇sell過靚仔
此外，蔡國威回應有指他去無綫見工，被女高層嫌棄唔靚仔：「真係冇去過，冇咁嘅事，冇被嫌棄唔靚仔，自己都冇sell過靚仔，自己亦唔會唔開心，科技咁發達，整到嘥錢，自己睇慣咗自己，正正常常，希望大家畀機會我，睇我順眼啲。」而劉錫賢則提到成立的亞視欠薪聯盟多了議員關注。有關亞視清盤案將會本月13日上庭，湊巧聯盟中有一個人申請到法援，會同日在法院舉行諮詢，他表示會前去支持。
採訪：卓寶花
攝影：陳志嵐
