香港零售「有幾唔掂」？連從事零售逾30年的迪生創建（113），也表示「為擴闊收入來源，董事局將採納證券投資作為本集團之主要業務之一（迪生證券？）。董事局將尋求上市及非上市持作買賣的證券投資之潛在投資機會（迪生創投？），以更好利用現有資源取得最大股東回報、擴闊收入來源及提升本集團財務狀況（迪生財務？）」，大家應心中有數。
友人笑稱，市道欠佳只是零售「唔掂」的短期催化劑，中長期負面基本因素是網購。他說：「我聽過一個消費個案，有朋友喺某名店睇中兩條裙，夾埋約兩萬蚊，原本決定買㗎喇，突然諗起不如去名牌網格吓價啦，點知一格就出事。」
他續稱：「兩條裙網上每條買4,000蚊，平一大截！慳咗咁多，咪睇吓有無好嘢買嚟襯吓，一睇，嘩，俾佢發現好多平咗成半嘅鞋呀、外套呀同袋咁，結果埋單係買咗7萬蚊！網購已經唔係新聞，網購買貴嘢已經成為平常事就係大新聞！你話零售點有得搞？」
實體「玩完」？他說：「暫時都唔會，VR（虛擬實景）普及後就難講。」廿二世紀網購殺人網絡？
密西比