亞投行行長金立群連續兩日在港出席講座與論壇，噚日去到第三場，佢下晝出席由團結香港基金舉辦嘅論壇，佢不但發表演講，仲參加由南豐行政總裁梁錦松擔任主持嘅座談環節，同場嘉賓包括渣打大中華及北亞地區行政總裁洪丕正、置地行政總裁彭耀佳，仲有甚少高調出席財經論壇嘅信置（083）主席黃志祥。
難得見到黃志祥公開演講，暢談佢對亞投行嘅睇法，大家當然要認真聽佢講乜喇。開波冇耐，黃志祥就話，佢好榮幸早前喺新加坡見過金立群，事關之後就只能夠透過電視見到金行長。佢又認為，金立群可以打理亞投行，應該係世界上其中一個最幸運嘅男人。講到咁樣，真係送咗好大頂高帽畀金立群，難怪金立群笑成咁喇。