九龍倉（004）經營銅鑼灣時代廣場與尖沙嘴海港城兩大商場，過去十幾年受惠於自由行，家陣市況逆轉，內地自由行旅客減少，生意當然受到影響，個別董事都要減花紅。
根據九倉最新年報，主要負責內地業務嘅第一副主席周安橋，舊年花紅大減兩成或250萬元，不過都袋1,000萬元花紅，年薪總額減12%，都有1,560萬元。
負責租務嘅李玉芳，花紅就縮咗100萬元，舊年再冇過千萬花紅，得番950萬元，不過年薪總額維持1,600萬元。雖然話減花紅，但佢哋都仲係千萬年薪嘅打工仔。而舊年5月升做主席嘅吳天海，冇反映全年做主席嘅人工，舊年年薪都有2,296萬元，微升7%，相當唔錯喇。
其實家陣中港經濟與零售市道轉差，上市公司管理層人工加得少或者減花紅應該都係常識吧。