【看淡後市】
大時代轉眼一年，豐盛金融資產管理董事黃國英（Alex），拎起過去一年的成績單，眼明手快靚入靚走，更被網民封為「幪面盤王」，至去年底埋單賺三成。回顧港股由大時代變大中伏，他形容今次是一次「集體綁票案失敗，我哋去綁架股票，諗住大陸佬拎錢嚟贖，結果原來冇人去贖」。展望未來，他嘆口氣：「灰！」認為去年的大時代，已是港股最後一個party，中國將出現日本式的迷失。
回想當年今日，內地一公佈公募基金可投資港股，黃國英二話不說先掃200張國企夜期，至一開市再大手購入港交所Call、AH差價概念股。結果4月份，基金單月勁贏近兩成。識得買都要識得走，至6月份全民皆股之時，中方公佈將推出基金互認，加上眼見行家惠理（806）謝清海亦減持，就把握機會走貨。
他指中國現時似日本，樓市炒爆，公司債變中國內債，料會出現日本式迷失，大市呈上落格局，「唔會有美國金融海嘯咁狂冧，但𠵱家上落好窄，慘過股災」。
記者：倪敏慧