由陳浩天任召集人嘅香港民族黨，被港澳辦、中聯辦以至老董先後炮轟後，新民黨主席葉劉淑儀「偏向虎山行」，4月6日傳咗個電郵畀呢個黨，話覺得本土主義「無問題」，遺憾係香港至今未就「甚麼是香港人」等達至共識，支持港獨趨勢或傷害香港，希望約見該黨交流本土主義嘅睇法喎。
香港民族黨收到電郵後，昨喺fb請葉劉「食檸檬」，批評葉劉曾助「港共殖民政府強推23條惡法」，「罪行罄竹難書」，指除非葉劉迷途知返，「脫離親中派，支持香港獨立，否則無事可議」，又話葉劉曾批評本土路線無前途，現時卻指本土主義無問題，證明親中派欲借高舉「本土」之名蒙騙港人，質疑葉劉試圖「染指大專學界」，籲年輕學子同殖民統派劃清界線。 葉劉話任何交流唔應該有前設，對香港民族黨嘅回應感失望，仲話覺得佢哋思想偏激。