金像獎曲終人未散，《十年》贏咗最佳電影，除咗洪祖星話投票機制有問題要改制；黃百鳴又葡萄話以後拍啲爭議性題材就有獎拎，連立法會議員梁美芬都喺報紙專欄轟爾冬陞：「爾導演實應反省為何這部宣揚港獨的電影會在他負責的協會取得最佳獎項……」
拍戲唔係鬥錢多
金像獎前主席，導演張同祖噚日接受電話訪問，逐點反駁話：「鍾唔鍾意一部電影係一回事，最唔啱係洪祖星、梁美芬要爾冬陞反省，呢個係完全唔知乜嘢叫投票自由概念。佢以為邊個做（主席）就可以話事邊套戲得獎，佢講緊乜嘢呀？」
講到投票機制，祖哥話專業評審制度係行之已久、不停改進，祖哥連佢最老友嘅黃百鳴都有唔少意見：「佢係創作人點可以講呢樣嘢，拍電影係咪淨係用錢嚟比較，你睇吓以前金像獎最佳電影《香港製造》、《父子情》嗰啲好貴咩？唔好亂噏啦，電影唔係淨係拍場面技術，拍電影係因為你想要講古仔反映思想，多人認同係因為反映到時代。你叫佢（黃百鳴）拍一個《反十年》、《建港偉業》睇吓有冇人睇，睇佢賣唔賣錢，攞唔攞到獎吖，爭論性吖嘛。祖哥話好耐都冇人拍社會問題電影，好多人都認同《十年》嘅創作精神。
撰文：馮仁昭
